د کورنیو چارو وزارت د نشه یي توکو سره د مبارزې معینیت ملکي مرستیال د ازبکستان هیواد له سفیر سره لیدنه وکړه.
په دغه لیدنه کې، دواړو لورو د نشه یي توکو سره د مبارزې پر لارو چارو بحث او تبادل نظر وکړ.
د یاد معینیت ملکي مرستیال الحاج مولوي عبدالرحمن قاسمي، راغلي پلاوي ته د ښه راغلاست تر څنګ په افغانستان کې، د نشه یي توکو سره د مبارزې په څرنګوالي معلومات وړاندې کړل.
وروسته د نشه یي توکو سره د مبارزې معینیت د دفتر رییس الحاج مل پاسوال مولوي حسیب الله احمدي هم غونډې ته د نشه یي توکو پر وړاندې د مبارزې په هکله د اسلامي امارت پر ژمنتیا رڼا واچوله او د ازبکستان له سفیر څخه یې وغوښتل چې د نشه یي توکو د لمنځه وړلو په برخه کې د یاد معینیت سره همکاري وکړي.
د نشه یي توکو سره د مبارزې معینیت مسوولینو دغه راز، د ازبکستان سفیر ښاغلي یادګار خواجه شادمانوف څخه وغوښتل چې په راتلونکي جوړیدونکي کانفرانس او د نشه یي توکو سره د مبارزې منسوبینو د ظرفیت لوړونې په برخه کې هم همکاري وکړي.
په غونډه کې، د نورو مسایلو تر څنګ د نشه یي توکو په پروندو کې د بندیانو پر تبادلې هم هر اړخیزه خبرې وشوې.
د ازبکستان سفیر ښاغلي یادګار خواجه شادمانوف د نظریاتو او وړاندیزونو له اوریدو وروسته په افغانستان کې د اسلامي امارت له هوډ څخه د نشه یي توکو سره د مبارزې په برخه کې خوښي وښودله او مسوولینو ته یې د هر راز همکارۍ ډاډ څرګند کړ.
په پای کې دواړو لورو پر ګډه همکارۍ ټینګار وکړ او د نشه یي توکو سره پر ګډه مبارزه ژمنه وشوه.