هرات کې پولیسو له یو کور غلا شوي ۳۰ میلونه افغانۍ او دوه کیلو ګرامه سره زر موندلي
د هرات امنیه قومندانۍ د جنایي جرمونو په وړاندې د مبارزې مدیریت د کشف او اختطاف امریت منسوبینو څلور هغه حرفوي غله نیولي چې شپږ میاشتې وړاندې یې د یاد ولایت په کهسان ولسوالۍ کې له یو کور د یوې ښځې په مرسته دېرش میلونه افغانۍ او دوه کیلو ګرامه سره زر غلا کړي وو.
نیول شوې پیسې او سره زر د اسنادو تر ارزولو وروسته پولیسو خپل اصلي مالک ته سپارلي دي چې یاد کس د امنیتي ځواکونو هڅې ستایلي دي او د هرات له امنیه قومندانۍ یې ځانګړې مننه کړې ده.
له نیول شوو غلو یو میل کلاشینکوف، یو میل تومانچه او یو عراده موټر هم ترلاسه شوی دی.
د کورنیو چارو وزارت ډاډ ورکوي چې د یادې قضیې په تړاو د پولیسو څېړنې روانې دي او له عاملینو سره به د نافذه قوانینو سره سم قانوني چلند ترسره شي.