د کورنيو چارو وزير الحاج خلیفه سراج الدین حقاني د پکتيکا ولايت ډيلې ولسوالۍ ته سفر وکړ
ښاغلي وزیر په هغې غونډې کې ګډون وکړ چې سيمه ييزو مسؤلينو، قومي مشرانو او ګڼ شمېر ځوانانو پکې ګډون درلود. په پيل کې د يادې ولسوالۍ د اوسېدونکو په استازيتوب قومي مشر حاجي محمد حليم، خليفه صاحب ته ښه راغلاست ووايه او يادې ولسوالۍ ته يې د خليفه صاحب سفر په سيمه کې د مېشتو قومونو او ولس لپاره وياړ وباله. خليفه صاحب د اسلامي نظام د حاکميت په موخه د يادې ولسوالۍ د اوسيدونکو قربانۍ و ستايلې او د جهادي بهير بريا يې د ورته قربانيو پايه و بلله. نوموړي وويل دغه ولسوالۍ که څه هم له مادي پلوه کمزورې ده خو په معنوي لحاظ ځانګړی ارزښت لري. خليفه صاحب له بې اتفاقي څخه د ځان ژغورنې او د حکومت او ولس پر يووالي ټينګار وکړ هيله يې و ښوده چې د جهادي دورې په څېر بايد متحد و اوسو او د شخصي ګټو پر ځای، ملي ګټو ته لومړيتوب ورکړو. هغه وويل افغانانو ته دين او وطن دواړه مهم دي او زياته يې کړه چې د پياوړې اسلامي عقيدې په لرلو سره بايد په ګډه د هېواد د پرمختګ لپاره کار وکړو. نوموړي د حکومت غېږه ټولو افغانانو ته پرانيستې و بلله او په ملي يووالي يې ټينګار وکړ. خليفه صاحب مجاهدينو ته په سپارښتنو کې وويل: خلک بايد په نرمـۍ سره د خپلو اسلامي ارزښتونو درناوي ته سوق شي او له دوی یې وغوښتل چې، د ولس سره ښه چلند ولري.