د کاپیسا ولایت امنیتي وضعیت وارزول شو
د کورنیو چارو وزارت ستر امنیتي معین ستر پاسوال عبدالصبور قانع نن کاپيسا ولایت ته ولاړ او هلته یې د یاد ولایت له رهبرۍ سره یوځای د کاپيسا د امنیتي وضعیت د ارزونې په موخه غونډه وکړه.
سترپاسوال عبدالصبور قانع کاپیسا کې د امنیتي ځواکونو وروستۍ لاسته راوړنې وستایلې او ویې ویل، هر هغه ډله چې تاوتریخوالی کوي پر وړاندې یې رحم مه کوئ.
ښاغلي قانع د کاپیسا ولایت د امنیتي وضعیت د ارزونې سربېره د ملي پولیسو د بېلابېلو برخو ستونزې هم واورېدې او ډاډ يې ورکړ، چې د حل لپاره به یې کوټلي ګامونه پورته کوي.
همداراز د کاپیسا والي او د ولایتي شورا غړو د کورنیو چارو وزارت ستر امنیتي معین ته ډاډ ورکړ چې په یاد ولایت کې امنیتي وضعیت د پخوا په پرتله ښه شوی او کاپيسا کې د ولس او امنیتي بنسټونو ترمنځ غښتلې همغږي شتون لري.
په پای کې د کورنیو چارو وزارت ستر امنیتي معین د کاپیسا ولایت امنیتي ځواکونو ته ډاډ ورکړ چې دوﺉ د ولسمشر او وسله وال فوځ اعلی سرقوماندان، د ملي امنیت شورا او د کورنیو چارو وزارت رهبرۍ له کلک ملاتړ څخه برخمن دي او د دوﺉ ټولو ستونزو ته به په وخت سره رسیدنه کیږي.