د کورنیو چارو وزارت ستر امنیتي معین د بلخ ولایت د امنیتي وضعیت د ارزونې لپاره دې ولایت ته سفر وکړ
د کورنیو چارو وزارت ستر امنیتي معین ستر پاسوال عبدالصبور قانع چې د جمهوري ریاست سلاکار حاجی پیغمبر قل، د ملي امنیت عمومی ریاست ولایتي مرستیال او یو شمېر رئیسانو یې ملتیا کوله د بلخ ولایت امنیتي وضعیت څېړنې او په یاد ولایت کې د ترکمن قوم لاریون څېړلو په موخه بلخ ولایت ته سفر وکړ.
د کورنیو چارو وزارت ستر امنیتي معین لومړی په بلخ ولایت کې د ترکمن قوم لاریون څېړلو په موخه د بلخ له والي، مرستیال والي، ولایتي شورا رئیس، د بلخ ملي امنیت رئیس او د بلخ امنیه قوماندانۍ له مسؤلینو سره وکتل او د شهید جمعه د تښتونې او قتل په اړه یې ورسره مفصلې خبرې وکړې.
د بلخ والي محمد اسحاق رهګذر د کورنیو چارو وزارت ستر امنیتي معین او ورسره راغلي پلاوي ته د محمد جمعه د اختطاف په اړه معلومات ورکړل ویې ویل، موږ خپلې جدي هڅې پیل کړي او ژمن یو چې د خپلو ټولو شته امکاناتو څخه په ګټې اخیستنې سره د یادې پېښې مجرمین ونیسو او د قانون منګولو ته یې وسپارو.
د کورنیو چارو وزارت ستر امنیتي معین د بلخ والي د معلوماتو له اورېدو وروسته د لاریون کوونکو سره جلا جلا ناستې ترسره کړې او ډاډ یې ورکړ چې یادې پېښې ته به د ټولو امنیتي او کشفي ارګانونو له لوري رسېدنه کېږي او سر له نن شپې به زموږ کاري ټيم چې د جمهور رئیس په لارښوونه له ماسره له مرکزه راغلی په ګډه ګروپي کار کوي څو یوې مثبتې پایلې ته ورسېږو.
ښاغلي قانع د ترکمن قوم څخه وغوښتل وړاندې له دې چې موږ خپل کار شروع کړو نو له تاسې زما هیله دا ده چې خپله د تحصن خیمه مو ټوله کړئ ترڅو تاسې موږ په ارامه توګه د یادې پېښې د مجرمینو د نیولو لپاره خپل جدي کارونه پیل کړو.
وروسته د ترکمن قوم مشرانو او ځوانانو د کورنیو چارو وزارت ستر امنیتي معین وړاندیز په پوره ورین تندي ومانه او خپله د تحصن خیمه یې راټوله کړه.