د کورنیو چارو وزارت اعلامیه!
ښايي سبا د جمهوري ریاست د ځینو نوماندانو پلویان په کابل ښار کې لاریون وکړي. امنیتي ځواکونه د خلکو دیموکراتیکو حقونو ته په درناوي، د دوی امنیت خوندی ساتي؛ خو د نوماندانانو پلویان باید د لاریون پرمهال لاندې ټکي په جدي توګه په پام کې ونیسي:
۱) هېڅوک حق نلري، چې په ښار کې د عامه امن او نظم د ګډوډېدو او اخلال لامل وګرځي.
۲) هېڅوک حق نه لري، چې لاریون ته ناریه او جارحه وسلې راوړي.
۳) هېڅ لاریون کوونکی نشي کولای، چې د لاریون پر مهال له امنیتي ځواکونو سره له اخ او ډب او تاوتریخوالي کار واخلي.
کورنیو چارو وزارت د عامه امن او نظم د ټینګښت او د لاریون کوونکو د امنیت د خوندي ساتنې په برخه کې پوره تیاری لري او هر هغه څوک چې د خلکو د روحي وضعیت د ترینګلتیا او غیرقانوني کړنو لامل شي، نو د پولیسو له جدي قانوني چلند سره به مخ شي.