د ملي پولیسو د لوړو زده کړو او رهبرۍ له قومندانۍ څخه ۱۰ تنه لوړ رتبه افسران فارغ شول
د کورنیو چارو وزارت ۱۰ تنه لوړ رتبه افسران د ملي پولیسو د لوړو زده کړو او رهبرۍ په قومندانۍ (استاف کالېج) کې له شپږ میاشتنیو زده کړو وروسته فارغ شول.
د یادو کسانو د فراغت سندونه د ورکړې پر مهال د کورنیو چارو وزارت د ښوونې او پرسونل معین پوهنیار لوی پاسوال عبدالجبار پردلي فارغ شویو افسرانو ته مبارکي وویله او ویې ویل، چې د کورنیو چارو وزارت د لوړ رتبه افسرانو د ستراتیژیک کورس موخه ستراتیژیک مدیریت او رهبري ده او پدې برخه کې د مسلکي افسرانو روزنه د ملي پولیسو په لیکو کې د مدیریتي ستونزو د پوره حل لامل کېدای شي.
پوهنیار لوی پاسوال عبدالجبار پردلي د ملي پولیسو د لیکو په هره برخه کې د مسلکي او کارپوه کسانو ګمارنه اړینه یاد کړه او ویې ویل، چې د کورنیو چارو وزارت رهبري ورځ تر بله هڅه کوي، څو د پولیسو د زده کړو کچې د لوړولو په برخه کې غښتلې برنامې جوړې کړي؛ چې د لوړ رتبه افسرانو ستراتيژیک کورس یې د مدیریت او رهبرۍ په برخه کې یوه ښه بېلګه ده.
هېره دې نه وي چې په پای کې فارغ شوي لوړ رتبه افسران د کورنیو چارو وزارت د ښوونې او پرسونل معین لخوا د فراغت سندونو او ستاینلیکونو په ورکړې ونازول شول.