د خبریال او مطبوعاتو د فعال نعمت روان د شهادت په تړاو د کورنیو چارو وزارت مطبوعاتي اعلامیه
ترهګرو د خپلو جنایتونو په دوام دا ځل د کندهار ښار د څوارلسمې امنیتي حوزې په اړوند سیمو کې خبریال او د تلوېزیون پخوانی ویاند نعمت روان شهید کړ.
ترورېستي ډلې د دې ډول جنایتونو او بریدونو په ترسراوي سره نشي کولی، چې د خبریالانو او بیان ازادۍ غږ محدود کړي.
موږ ځان د بیان ازادۍ او خبریالانو د امنیت پر ساتنې مکلف ګڼو. امنیتي ځواکونو په وروستیو میاشتو کې د موندل شویو اطلاعاتو پر بنسټ د خبریالانو پر وړاندې د ګواښ لسګونه پېښې شنډ کړې او همدارنګه د خبریالانو او مدني فعالانو د وژنې او ترور ګڼې ترورېستي ډلې یې نیولې او د قانون منګولو ته یې سپارلې دي.
د کورنیو چارو وزارت مشرتابه د شهید نعمت روان کورنۍ ته د خواخوږۍ او تسلیت ژور مراتب وړاندې کوي او د څښتن تعالی له درباره ورته د زغم د دوعا لاس لپه کوي.
