ابلاغیه
د هېواد د عامې روغتیا وزارت د څېړنو له مخې پدې وروستیو کې کورونا ویروس د افغانستان په ښارونو کې په چټکۍ د خپرېدو په حال کې دی او د مخنیوي لپاره یې باید ژر تر ژره جدي او بېړني اقدامات ترسره شي.
تر دې وړاندې ښارونو کې د خلکو د روغتیا ساتنې او پر دې خطرناک ویروس له اخته کېدو د مخنیوي په پار ګرځبندیز وضع شوی و او اوس اړتیا ده چې وضع شوي محدودیتونه د تېر په پرتله لا جدي او ګړندي شي.
پر دې بنسټ کورنیو چارو وزارت ټولو هېوادوالو په تېره بیا کابل ښاریانو ته ابلاغ کوي، څو له خپلو کورونو ونه وزي او په سړکونو، بازارونو، تفرېح ځایونو او ... کې له ګرځېدنې او تګ راتګه ډډه وکړي.
پر دې سربېره ملي پولیسو ته هم لارښوونه شوې، څو هغه کسان چې له بېړنیو وظيفوي چارو پرته د لېږدوونکې واسطې/پلي تګ راتګ کوي، تر جدي څېړنې او ګروېږنې لاندې ونیسي او دوی سره قانوني جدي چلند وکړي.
د کومو ادارو کارکوونکي چې شتون یې لازمي دی، د آی. ډي کارت تر پوښتلو او ډاډ ترلاسه کولو وروسته به اجازه ورکول کېږي او له دې ابلاغیې مستثنا دي.
په اوسنیو شرایطو او وضع شویو محدودیتونو کې له ملي پولیسو سره د خلکو همکاري د هېوادوالو د روغتیا ساتنې ضامن کېدای شي.
